Vidadi Rzayev: “Kimsə bu nəticəyə görə cavab verməlidi” SORĞU

Yığmamızın Lüksemburqla son oyundakı biabırçı “sülh”lə bağlı vaxtilə millimizin şərəfini qorumuş bir neçə veteran futbolçunun və mətbuat nümayəndələrinin fikirlərini öyrəndik. Veteranlarımıza 3 sualla müraciət etdik. 1. Komandanın son oyunu barədə nə deyə bilərsiniz? 2. Yığmamızın hazırki durumdan çıxış yolunu nədə görürsünüz? 3. Sizin dövrün yığması Lüksemburqa qalib gələ bilərdimi?

Media nümayəndələrinin isə ümumi fikri bizi daha çox maraqlandırırdı. Yeri gəlmişkən, fikrini öyrəndiyimiz jurnalistlərdən 3-ü idman mətbuatını deyil, siyasi mətbuatı təmsil edirlər. Hər halda onların mövqelərini də bilmək maraqlı olardı.

Vidadi Rzayev: 1. İlk hissədə komanda yaxşı oynadı. 2-ci hissədə isə, gözləniləndən zəif çıxış etdi. Qalib gələ bilməməyimizin səbəblərini deyə bilmərəm. Çünki, bu işin içində deyiləm. Səbəbini Foqtsdan, AFFA rəhbərliyindən soruşmaq lazımdı. Kimsə bu nəticəyə görə cavab verməlidi.

2. Baş məşqçi yerli mütəxəssi olmalıdı. Bunu Foqts hələ milliyə yeni təyinat alanda da demişdim. Alman işini düzgün qura bilmədi. Ziyanı futbolumuza dəydi. Elə bilirdi ki, bura İspaniya, İtaliyadı, hazır yerdə işləyəcək. Amma futbol sahəsində ciddi problemləri olan bir ölkəyə gəlmişdi. Hər şeyi hazır istəyirdi. Bir də ki, futbolçular klublardan milliyə gəlir. Çox vaxt da hazırlıqsız. Klublarımızda da əməlli-başlı islahatlar aparılmalıdı.

3. Bizim dövrümüzdə də Millinin uğursuz nəticələri var idi. Amma gəlin baxaq, həmin vaxt indiki şərait bizə yaradılmışdımı? Bizim dövrümüzdə FİFA reytinqində 97-ci pilləyə kimi irəliləmişdik. Foqts gələndə irəli aparmaqdansa, geriyə saldı. Bir mərhələdə 7 xal toplamaqla deyil, indiki şəraitlə bunu istənilən yerli mütəxəssisimiz bacarardı.

Sakit Alıyev: 1. Komandamız bərbad oyun göstərdi. Doğrudu ilk yarıda bir qədər inamlı təsir bağışlayırdılar. Amma bu sözləri ikinci hissə haqda demək olmaz. Lüksemburq daha üstün futbol nümayiş etdirdi. Qalib gəlməyə də haqları çatırdı. Futbolçuların hamısı imkanlarından aşağı səviyyədə çıxış etdilər. Yalnız Mahir Şükürovun oyunu xoşuma gəldi.

2. Birinci növbədə Foqts getməlidi. Onun yerinə yerli məşqçilərdən biri təyin olunsa daha yaxşı olar. O qədər təcrübəli mütəxəssislərimiz var ki, bekar qalıblar. Əcnəbilərdən isə ancaq Naci Şensoyun millimizə köməyi dəyə bilər. Həm türkdü, özümüzünküdü, həm də Azərbaycan futboluna yaxından bələddi. Bundan başqa idarəetmə sahəsində də islahatlar aparmaq vacibdi. Dərdimiz bir deyil, beş deyil, hansını deyəsən?

3. Futbolda hər şey ola bilər. Amma bizim dövrün millisi Lüksemburqu gözüyumulu udardı.

Fərrux İsmayılov: 1. Əla oynadılar, xoşum gəldi. Amma hücum xəttində problemlər var. Müdafiəçinin qol vurması da buna sübutdu. Rəqib ardıcıl 3 ötürmə edə bilmirdi, tez-tez səhvlər buraxırdılar. Bunlardan istifadə etmək lazım idi. Yığmanın son zamanlar göstərdiyi ən yaxşı oyun idi. Amma nəticə üzücü oldu. Görəsən, son saniyələrdə qol buraxsaydıq, onda nə olacaqdı? Maraqlıdı.

2. Nə qədər ki, Milli çempionatda yerli futbolçular azlıq təşkil edəcək, irəli getməkdən dəm vura bilməyəcəyik.

3. Vallah, bu futboldu. Gözlənilməzliklər həmişə olur. Bizim vaxtın millisi ilə Lüksemburqu rahat udmaq olardı. Əfsuslar olsun ki, bizim vaxtımız çoxdan keçib.

Samir Musayev: 1. Çox zəif oynadıq. Bəzi futbolçular elə bil meydanda yox idilər. Lüksemburq kimi komandanı udmamaq, özü də Bakıda böyük faciədi.

2. Çıxış yolunu ancaq uşaq futboluna daha çox diqqət ayırmaqda görürəm. İndidən bu sahəyə fikir vermək lazımdı ki, 10 ildən sonra nəyəsə ümid edə bilək.

3. Mənim vaxtımdakı yığma Lüksemburqla 100 oyunda da qarşılaşsaydı, hamısını udardı.

Səbuhi Məmmədli (Lent.az saytının redaktoru): “Azərbaycanda AFFA deyilən qurum buraxılmasa, futbola “fidbol” deyənlər çıxıb getməsə, sabah Andorrayla da bu durumda qalmayacağımıza təminat yoxdur. Odur ki, azarkeşlərin istefa şüarını təbii qarşılayıram. Mən Rövnəq müəllimin yerinə olsam, o hiyləgər Foqtsu məhkəməyə verərəm. 5 il bundan qabaq gəncləşdirmə siyasəti deyib hoqqaya başlamışdı. Artıq həmin gənclər qocalıblar. Və bu illər ərzində 7 xal “rekordu”nu çıxmaq şərti ilə nə baş verib ki? Məncə almanları foqtslu-raablı qovmaq lazımdır. Onsuz da Almaniyadan bezmişik”.

Etibar Cəbrayıloğlu (“Ədalət” qəzetinin yazarı): “Oyuna baxmamışam. Buna görə də, millimizin göstərdiyi futbola münasibət bildirmək yersiz olardı. Nəticə barədə isə... Lüksemburqu uda bilmiriksə, deməli, hər şey aydındı. Deməyə söz tapa bilmirəm.

Foqts başımıza qaxınc edir ki, xaricdə futbolçunuz yoxdu, əlimdə olan “yerli material”la nə edə bilərəm? Bəs səni bura niyə gətirmişdilər? Məgər bilmirdin ki, Azərbaycan futbolunun səviyyəsi necədi? Külli miqdarda pul alırsan ki, bu çatışmazlıqları aradan qaldırasan, problemlərin həllinə kömək edəsən. Foqts üzərinə düşən işi bacarmadı. Göstərdiyi nəticələrə görə, Foqtsun millidən göndərilməsi qaçılmazdı və onu əvəzləyəcək məşqçinin işi də asan olmayacaq”.

Şəmsəddin Abbasov (Lider.TV-nin keçmiş əməkdaşı): ““Danışmağa söz tapa bilmirəm. Komanda bərbad futbol göstərdi. Lüksemburq bizdən yaxşı oynayırdı. Nə qədər gec deyil, Foqtsdan imtina etmək lazımdı. Ondan səviyyəli neçə məşqçimiz var. Azından Premyer Liqada ilk üç yeri tutan komandaların baş məşqçiləri millini çalışdırmağa layiqdilər. Həm Böyükağa Hacıyev, həm Qurban Qurbanov, həm də Kaxaber Sxadadzenin milliyə Foqtsadan qat-qat çox xeyiri dəyə bilər”.

Yusif Nəzərli (“Şərq” qəzetinin baş redaktor müavini): “Sürpriz gözləmirdim. Belə nəticələrə çox alışmışıq. Düşünürəm ki, bu gedişlə bir neçə il də azarkeşlərə sevinc yaşatmaq mümkün olmayacaq. İlk hissədə azacıq komanda oyunu göstərə bildik. Amma nə fayda... fiziki hazırlıq, qələbənin fəlsəfəsi, fədakarlıq, bütün psixoloji səfərbərliyi sonda qola çevirmək – bax, bunlar millimizin əsas problemləridi. Komandanın yaratdığı qol epizodlarının boşa getdiyini görəndə fikirləşirsən ki, illərdi futbolda var olan hücumçuların peşəkarlığı nə zaman özünü göstərəcək? Halbuki, bu vəziyyətlərdən Avropanın ortababları maksimum yararlanardılar. Komandada peşəkarlıq çatmır – hücumda, müdafiədə, yarımmüdafiədə, hətta məşqçilər korpusunun oturduğu yerdə də”.

Rüfət Nadirli (“İnterAz” televiziyasınn idman aparıcısı): “Bu oyun yox, biabırçılıq idi. Berti Foqtsun növbəti dəfə bizimlə “məzələndiyi” gün idi. Nə vaxt idi özümə söz vermişdim ki, millinin oyunlarına baxmayım. Bunu başqa cürə yozmasınlar. Sadəcə baxımsız oyuna və əsasən də Berti Foqtsa görə baxmırdım. Nədənsə özümü bu dəfə saxlaya bilmədım. Kaş baxmayaydım. Yenə əsəb, yenə də Berti Foqtsun qırmızı sifəti... İkinci hissədə rəqib bizdən daha inamlı idi. Bəxtimiz gətirdi ki, uda bilmədilər. Həmin anlarda Berti Foqts yəqin Allaha dua edirmiş ki, nə olar qol vurmasınlar. 1 ayın 20 gününü Almaniyada, 10 gününü Azərbaycanda keçirən bir şəxsdən nə gözləyək? Təbii ki heç nə, amma “paçka-paçka” pullar alır və öz ölkəsində yeyir”.

Ceyhun Əliyev (“Gündəlik Teleqraf” qəzetinin əməkdaşı): “Millinin baş məşqçisi Berti Foqts bu gün yəqin ki, Ərdoğan qədər nifrət olunan şəxslərdəndi. Ancaq hesab edirəm ki, alman məşqçi bu gün Azərbaycan futboluna aidiyyatı olan şəxslər arasında ən az günahı olandı! Səbəblərin çoxu, bununla bağlı “Het-trik news”da geniş yazıyla görüşünüzə gələcəm. İndi isə Lüksemburqun qapısına 180 dəqiqə ərzində (səfər oyununu da nəzərə almaqla) vurduğumuz yeganə qolun müəllifi Ruslan Abışovun “istefa qışqıran fanatlar stadiona gəlməsinlər” açıqlamasına toxunacam. Sadəcə, toxunacam. Mən Ruslanla tamamilə razıyam ki, bizdə azarkeş kütləsi yoxdu. Orta və yaşlı nəsil futbola gəlmir, tribunalara yeni nəslin nümayəndələri axışır və qarşılarında heç bir təcrübəli fanat görmədikləri üçün əsl azarkeşin necə olduğunu bilmirlər. Niyə orta və yaşlı nəsil stadiona getmir, ay Ruslan? Bu sualı heç olmasa bircə dəfə özünə vermisən? Tanışlıq, tapşırıq təyin olunan komandaların “fan-klub” rəhbərləri futbolun nə olduğunu bilirlər? Söhbət klublardan maliyyələşən “fan-klub”lardan gedir. Daha bir məqam. Ay Ruslan, sənin təmsil etdiyin yığma komanda FİFA-nın reytinq cədvəlində 120-ci pillədə qərarlaşıbsa, azarkeşin də buna uyğun intellektə malik olacaq da! Təbii ki, komandanı irəli səsləmək əvəzinə “istefa” qışqırmaq anormallıqdı. Axı həmin vaxt millimiz hücumlar edir, oyunun bitiminə isə təqribən 20-22 dəqiqə qalırdı. Lakin bir daha təkrar edirəm, sənin formasını geyindiyin milli komanda 120-cidir! Bu bədbəxtçiliyi də futbolumuza sən və sənin komanda yoldaşların yaşadır. Ona görə ağız büzməyə dəyməz. Sadəcə, azarkeşlər Foqtsu yox, futbolçuları istefaya çağırsaydı, daha ədalətli olardı.

Rüstəm Mikayıllı (Azerisport.az saytının əməkdaşı): “Açığı, belə oyunlardan sonra matc haqda nəsə demək milliyə bəraət qazandırmaq kimi bir şeydir. Çünki  Luksemburqa qarşi istənilən heyətdə və durumda, hücum xəttindən, lap belə cinah müdafiəçisini oynatsan belə, qalib gəlməlisən, üstəlik Bakıda. Millimiz qələbə qazana bilmədisə futboldan yox, başqa şeylərdən danışmaq lazımdır. Həmçinin matçdan sonra bir futbolçunun azarkeşləri ittiham etməsi anlaşılmazdır. Bakı şəhəri qədər əhalisi olmayan yarıpeşəkar futbolçulara qarşi 3 hissə qol vurmayan oyunçularımızın səbəb axtarması gülüncdən başqa bir şey deyil. Azərbaycan azarkeşi boynu bükük şəkildə yox, başı uca gəzmək istəyir, amma millinin nəticələri buna imkan vermir”.

Amal Abuşov (Futbol+ qəzetinin köşə yazarı): “Millimiz səfərdə Lüksemburqu uda bilməyəndə, iddia edirdik ki, bizimkilər səfər sindromundan əziyyət çəkir. Amma dolu tribanalar belə qələbə qazanmağımıza yetərli olmadısa, deməli biz onlardan heç də güclü deyilik. Konkret bu oyun AFFA rəhbərliyinin Foqtsa güvənməklə səhvə yol verdiyini bir daha isbatladı. Lüksemburqu uda bilməyən komanda Bakıda Rusiyani məğlub eləsə, mən bu qələbənin təmizlyinə şübhə edərəm. Görünür, klubsuz qalan Subaşiçin yığmanın heyətində  meydana çıxması kiminsə sifarişi imiş, Allah da bu haqsızlığı götürmədi”.

“Het-trik news”