"Qarabağ"ın futbolçusu İnyesta ilə müqayisə olunmağından danışdı
04.03.2013 | 5279 dəfə oxunub
"Deməzdim ki, xüsusi bir həyəcanım vardı. Təbii ki, "İnter"lə oyun olduğuna görə bir qədər fərqlilik vardı". Stadium.az xəbər verir ki, bu sözləri "İnter"lə oyun haqda danışarkən klubun rəsmi saytına verdiyi çıaqlamada "Qarabağ"ın üzvü Toğrul Bilallı deyib. Gənc futbolçu baş məşqçi Qurban Qurbanov tərəfindən aldığı tapşırıqlardan da danışdı: "Turnir cədvəli baxımından oyun vacib idi. Görüşdən qabaq Qurban müəllim nə dedi? Bildirdi ki, rahat ol, təlim-məşq toplanışında oyunlara neçə çıxırdınsa eyni tərzdə meydana çıx. Dedi ki, mümkün qədər Vüqar və Əfranın sürətindən istifadə et. Onları topla təmin etməyimi istədi. İlk hissədən sonra Qurban müəllim mənə təşəkkür etdi. Oyunuma qiymət verməyim düzgün olmaz. İlk hədəfim daha çox oynamaq şansı qazanmaqdır. Meydanın mərkəzində, hücumçuların arxasında oynamaq mənə daha xoşdur. Avropada bu mövqedə oynayanlardan Xavi, İnyestadan xoşum gəlir. Yox, komanda yoldaşlarım ona görə məni "İnyesta" çağırmırlar (gülür). Bəlkə də onun kimi sakitəm və onun kimi qol vurmaqdan daha çox ötürmə verməkdən xoşum gəlir. Azərbaycanda isə Rəşad Sadiqov "Qarabağ"da oynayarkən mənə nümunə olub. Futbolumuzda pleymeyker probleminin olub-olmadığını deyə bilmərəm. Özümü xilaskar saymıram. Mənim futbol istəyim, daha sadə futboldur: daha çox ötürmə və komanda naminə oynanılan futbol..."