Mais Mənsimov: "Bizi sevindirin, mən də sizi sevindirərəm"
10.02.2013 | 6466 dəfə oxunub
“Xəzər Lənkəran” Futbol Klubunun prezidenti Mais Mənsimovun adından Lənkəranda "Palmalife" otelində komanda üçün şam yeməyi təşkil olunub. Stadium.az "Xəzər Lənkəran"ın rəsmi internet saytına istinadən xəbər verir ki, klubun prezidenti qış fasiləsindən sonra Lənkərana dönmüş komandanı salamlayaraq heyətə gələcək çıxışlarında müvəffəqiyyətlər arzulayıb. Şən mühitdə keçən ziyafət zamanı Mais Mənsimov komandaya gələn yeni futbolçularla tanış olaraq onlara uğurlar diləyib. Prezident yeni oyunçuların “Xəzər Lənkəran”ın qələbələrinə töhvə verəcəklərinə ümidvar olduğunu bildirərək onlara tezliklə öz çıxışları ilə klubun tarixinə adlarını yazdırmağı arzulayıb. Çıxış edərək Mais Mənsimov söyləyib: "Siz oynayın, qələbələri sıralayın, bizi sevindirin, mən də sizi sevindirərəm". Öz növbəsində futbolçular da klub prezidentinə “Xəzər Lənkəran”ın uğur qazanması üçün əllərindən gələni edəcəklərini vəd ediblər. Təntənəli axşamın davamında fiziki hazırlıq üzrə məşqçi Erik Roketa royal arxasına keçərək bəzi klassik və müasir əsərləri ifa edib.