Namiq Məstanov: “Əsgər Abdullayevdə başkəsənlik yox idi” Müsahibə

Namiq Məstanov “Turan” klubuna yad sima deyil. O, bu klubun yaradıcılarından və ilk rəhbərlərindən biri olub. Uzun müddət idi ki, klubdan kənarda qalmışdı. Amma bir neçə ay əvvəl yenidən “Turan”a qayıtdı. O, komandanın vitse-prezidenti təyin edildi. Bundan sonra isə komandada bir çox dəyişikliklər oldu və özüylə bağlı hadisələrdə yaşandı. Məstanovla söhbət edərək elə bu məsələlərə aydınlıq gətirməyə çalışdıq:

- Komandaya qayıdışınız necə alındı?

- Klubun prezidenti Yaşar İbrahimovdan təklif gəldi, bunu bir qədər düşünəndən sonra razılıq verdim. Problem yalnız onda idi ki, ailəm Bakıdadır, ancaq bir qədər düşünüb klubun təklifini müsbət cavablandırdım.

- Deyilənə görə sizi “Turan”a PFL prezidenti Ramin Musayev apartdırıb...

- Mənim işim AFFA-da olduğundan, təklifdən sonra onunla da məsləhətləşdim. Musayev işimə-gücümə bələddir, mənə dedi ki, təklif varsa, gedim işləyim.

- Hazırda AFFA-nın “Turan”a yardımı var?

- Xeyr, heç bir yardımdan söhbət gedə bilməz.

- Onda “Turan”ı konkret olaraq kim maliyyələşdirir?

- Tovuz Rayon İcra Hakimiyyəti. Onlar bu pulu hardan alırlar, necə edirlər, bilmirəm. Əsas odur komandanı saxlayırlar.

- Hazırkı durumunuz necədir?

- Göz qabağındadır. Çempionat başlamamışdan əvvəl hər şeyi götür-qoy etdik, strateji plan cızdıq. Əsas məqsədimiz o idi ki, “qapazaltı” ifadəsini klubun üzərindən götürək, komandanın zədələnən imicini özünə qaytaraq. Sağlam kollektiv yaradaq, daha sonra azarkeşləri stadiona  qaytaraq, onlar bu komandanı əvvəlkindən də çox sevsinlər. Düşünürəm ki, müəyyən mənada buna nail olmuşuq. Əgər, dediklərimi tam yerinə yetirə bilsək, onda nəticə də qazana biləcəyik.

- Bəs qarşınıza hansı məqsəd qoyulub?

- Əsas işimiz əzmkar komanda yaratmaqdır. Tovuza gələn komanda düşünməsin ki, gedib oradan 3 xalı asanlıqla gətirə biləcəklər. Elə bir komanda yaratmalıyıq ki, digər rəqiblər bizdən çəkinsinlər. Daha püşkatmadan sonra qazanacaqları xalları sayan zaman “Turan”dan 6 xalı asanlıqla alacaqlarını düşünməsinlər. Hər bir komanda bilsin ki, “Turan”la oyun çətin olacaq. Artıq buna da nail olmuşuq.

- Əsgər Abdullayevi niyə planlarınızdan kənarlaşdırdız?

- Mən deməzdim ki, Əsgər Abdullayev pis məşqçisir. Sadəcə, onda “başkəsənlik” yoxdur, komandada ciddi nizam-intizam yarada bilmirdi. Abdullayevin futbolçu və ya komanda üçün konkret cəza tədbiri yox idi. Bütün bunlara görə də, bizim strategiyamıza uyğun gəlmirdi. Bizə elə məşqçi lazım idi ki, ciddi nizam-intizam yarada bilsin, futbolçuların yanında sözünün kəsəri olsun.

- Əfqan Talıbov belə məşqçidir?

- Talıbov hardasa, bizim planlarımıza uyğun gəlir. Bütün ailələrdə müəyyən intizamsızlıqlar olur, amma bu həddini aşırsa, çərçivədən kənara çıxırsa, artıq ciddi tədbirlər görülməlidi. Elə Popoviç məsələsi də belə oldu. 

- Popoviçin hərəkətini necə qiymətləndirirsiz?

- Popoviçi “Turan”a dəvət edəndə çoxları bizə deyirdi ki, səhv edirik, bu futbolçu çox intizamsızdır, amma bura gələndə onda belə hərəkətlər görmədik, hətta komandamıza çox köməyi də dəydi. Üstəlik qaydalara görə meydanda 21 yaşı tamam olmamış bir futbolçu da olmalı idi ki, bu mənada işimizə yarayırdı. Onun milli səviyəsində beynəlxalq təcrübəsi də olduğundan, meydana çıxan komandamızda təcrübəsiz oyunçu olmurdu. Amma komanda nəticə verdikcə, bu futbolçu özünü əvəzolunmaz hesab etməyə başladı. Bizdə onu əvəzləyəcək bir çox gənc futbolçu var.

- “Qarabağ” - “Turan” oyunundan sonra baş hakim Rəhim Həsənovla aranızda problem yaranmışdı...

- Bu gün bizim büdcəmizlə “Qarabağ”ın büdcəsi müqayisəyə gələ bilməz. Bu mənada oyundan sonra tuneldə komandamızın futbolçularını səfərdə “Qarabağ” kimi komandadan xal aldıqları üçün təbrik edirdim. Həmin məqamda Rəhim Həsənov PFL-in mühafizəçilərinin əhatəsində hakimlər otağına gedirdi. Bu anda, özü də çox sakit tərzdə ona “Rəhim, oyunu 97 dəqiqə oynatdın” dedim. Bundan sonra mənə qarşı nalayiq ifadə işlətdi, artıqlamasıyla da cavabın aldı.

- Bununla bağlı AFFA-ya hər hansı bir şikayətiniz oldu?

- Yox, heç bir şikayətimiz olmadı. Sadəcə, oyunun protokoluna baş verən hadisələri qeyd etdim.

- Bu hadisədən sonra Rəhimin cəzalandırılmaması düzgün idi?

- Bu mənim yox, onların öz işidir. 

- "Turan" ilk "altılığ"a düşə biləcək?

- İnşallah, bizdə elə buna çalışırıq. Şanslar yarı-yarıyadır. Əgər alınmasa, sadəcə təəssüflənə bilərik.

- “Bank of Azerbaycan"nın “Turan”a reklam verməsindən sonra belə söhbət çıxıb ki, sizin komanda da “Bakı”nın “kiçik qardaşı” oldu. Axı bu bank “Bakı” rəhbərliyinindir...

- “Bakı” və “Turan” rəhbərliyi sadəlövh insanlardan təşkil olunmayıb - “böyük-kiçik qardaş” söhbəti varsa, bunu “qarğa, məndə qoz” deyimi ilə bütün aləmə car çəksinlər. Əgər, belə bir söhbət olsaydı, bunu bağlı qapılar arxasında həll edərdik, heç kimində məsələdən xəbəri olmazdı.

- Bəlkə bu da bir siyasətdir?

- Heç bir siyasətdən söhbət gedə bilməz. İyul ayında mən özüm bir çox yerlərə - şirkətlərə, idarələrə, banklara, mobil operator şirkətlərinə forma reklamı ilə bağlı rəsmi müraciət etmişdim. Sadəcə olaraq, “Bank of Azerbaycan” təklifə müsbət cavab verib. Biz elə bu ərəfədə “Bakı”dan səfərdə xal aldıq. Ortada “qardaşlıq” olsaydı, heç bu da baş verməzdi.

- Konkret olaraq deyə bilərsiz ki, Popoviçi “Turan”dan nə üçün uzaqlaşdırdız?

- Popoviç klubun daxili nizam-intizam qaydalarını daimi olaraq pozduğu üçün, baş məşqçinin istəyi ilə komandadan uzaqlaşdırıldı. Baş məşqçi bununla bağlı rəhbərliyə təqdimat yazdı. Rəhbərlik də onun klubdan göndərilməsiylə bağlı qərar verdi. 

- Bu qərara Popoviçin spirtli içki aludəçisi olması təsir etdi?

- Təbii ki.

- Komandada Popoviçdən başqa heç kim spirtli içki qəbul etmir?

- Təbi ki, var, amma onlar intizam qaydalarını pozmurlar, hədlərini aşmırlar.

- Fasilə zamanı heyətdə hansı dəyişikliklər gözlənilir?

- Qarşıda 3 oyunumuz var. Bu qarşılaşmaların nəticəsindən asılı olaraq müəyyənləşəcək ki, komandada hansı dəyişikliklər olacaq.

"Het-trik news" qəzeti