Zeynal Məmmədov: “Qabaqcadan bilirdim ki, yerlidən lazım olanı ala bilməyəcəyik”

“Bakı”nın vitse-prezidenti Zeynal Məmmədovun müsahibəsi

- Novruz Əzimovun istefası Avroliqadakı uğursuzluqla bağlıdı?

- Biz “Mura”nı məşqçisiz də keçməliydik. Amma futbolçular bunu bacarmadılar. Burda elə bir dəyişiklik olmadı. Novruz Əzimov heç yerə getməyib. Klubda qalıb. Onun da öz vəzifəsi olacaq. Bu, bir-iki günün söhbəti deyil. Əzimov öz xeyir-duası ilə bizə müraciət elədi. Biz də Hafiz müəllimi gözləyirdik, bir az işləri var idi. Ola bilər, məğlubiyyətdə Əzimovun da günahı var. Amma onun istefa verməsi sırf bununla bağlı deyil. Sadəcə, bizim oyunçular “Mura”nı keçməyə məcbur yox, məhkum idilər.

- Yəni, siz baş məşqçidə günah görmürsüz?

- Var, niyə yoxdu ki?.. Bir rəhbər kimi mənim də günahım var nədəsə. Bunu qəbul edirəm. Amma yenə də ən böyük günah oyunçuların üzərinə düşür. “Mura”nı keçmək üçün onlara nə məşqçi, nə rəhbərlik, nə də başqa bir adam lazım idi. Düzdü, “Mura” yaxşı komandadı, ancaq bu gün “Bakı” ilə müqayisə olunası deyil.

- Deyirsiz ki, futbolçular “Mura”nı keçməyə məhkum idilər. Bəs onlara qələbə qazanmaq üçün nə mane oldu?

- Vallah, nə deyim… Arxayınçılıq da səbəb ola bilər, rəqibə aşağı baxmaq da. Futbolçularımız bəxtdən gileylənirlər. Ay nəbilim, gətirmədi, vura bilmədik. Hər şey ola bilər. Bunu hərə bir cür qəbul edə bilər. Amma mütləq qol vurulmalıydı. Başa düşdük, hücumumuz zəif idisə, orta xətt oyunçularımız var, onlar nəsə etməliydi. Məsələn, İspaniya millisi Avropa çempionatında demək olar ki, hücumçusuz oynadı, axırda birinci yeri götürdülər. Həm Bakıda, həm Sloveniyada 180 dəqiqə ərzində qol vura bilməmək “Bakı” üçün böyük siqnaldı. Belə heyətlə "Mura"nı keçməmək faciədi.

- Sloveniyadakı mətbuat konfransında Əzimov bildirmişdi ki, futbolçularda istək yox idi, oyuna məsuliyyətsiz yanaşırdılar.

- Bəli, o yanğı, istək yox idi. Bunların hamısı arxayınlaşmaq, rəqibə yuxarıdan-aşağı baxmağın nəticəsi idi. Ruh düşkünlüyü nədi? Bıçaq vursalar, qanım çıxmaz. Futbolçularımızın sifətinə baxmaq istəmirəm. Heç vaxt özümü qırağa çəkməmişəm. Ola bilər, özümü qınayacam ki, niyə hücumçu gətirmədik. Lakin bir şey bilirəm ki, islahatlar olacaq. Özü də necə lazımdır. “Mura” kimi büdcəsi iki yüz min avro olan bir klubu uda bilməyən futbolçular haqda ayrı nə demək olar? Mən futbolçuların özlərinə də demişəm. Onlar artıq harınlayıblar.

- Bu uğursuzluqdan sonra heyətlə bağlı radikal dəyişikliklər olacaq?

- Yeni baş məşqçi gəlib. Ola bilər, dəyişikliklər etsin. Bəlkə bəzi oyunçuları sərəncamında görmək istəməyəcək, yenilərin alınmasını tələb edəcək. “Bakı” rəhbərliyi həmişə baş məşqçinin arxasında durub, hər cür səlahiyyət verib. Özüm də bu gün komandayla görüşüb, dedim ki, bundan sonra hər şey baş məşqçinin səlahiyyətindədi. Kimin nə sözü olsa, mənə, yaxud kiməsə yox, birbaşa Bandoviçə desin. Hər şey onun nəzarəti altında olmalıdı. “Bakı” ən birinci haqq-ədalətin, daha sonra isə baş məşqçinin tərəfindədi. Biz sadəcə, Bandoviçin istəklərini yerinə yetiririk. Düzdü, bu gün bizdə məşq etməklə bağlı bir az problem var. Tikinti işləri gedir. İnşallah, 3-4 aydan sonra hər şey qaydasına düşəcək. Komanda üçün hər şey yaxşı olacaq. “Mura” ilə oyundan sonra mən özlüyümdə bir şeyi qətiləşdirdim ki, uğur qazanmaq üçün öz yetirmələrimizə, yerli uşaqlarımıza güvənməliyik. Onların oynaması daha məqsədəuyğundu. Bu gün “Bakı”nın əsasını milli komandaların üzvləri təşkil edir. Amma meydançada heç nə edə bilmədilər. Bu da bir daha onu göstərir ki, komandada yerli və gəlmə futbolçuların hərəsinin öz yeri var. Hər hansı legioner meydanda azərbaycanlı futbolçu qədər can qoya bilməz. Məsələn, “Qarabağ” yerlilərin hesabına dəfələrlə mərhələ keçib. Ona görə də azərbaycanlı futbolçulara daha çox yer vermək lazımdı. Legioner olsun, amma bu qədər yox. 3-4 nəfər səviyyəlisi olsa, bəsdi. Eybi yox, qoy, qiymətləri bir az baha olsun, yenə bilək ki, onların ətrafında oynayan gənclər nəsə götürəcəklər. “Bakı”da bundan sonra belə olacaq. Biz həm milli, həm də klub səviyyəsində ancaq yerli uşaqların hesabına uğur qazana bilərik.

- Göndəriləcək futbolçuların siyahısı genişdi?

- Bugünkü gündə yox. Çünki bizim onlarla müqavilələlərimiz var. Əsaslı islahatlar sonra olacaq. İndi sadəcə, bu, mümkün deyil. Çünki yeni çempionata az qalıb. Ola bilər, qışda bəziləri göndərilsin, ola bilər, mövsümün sonunda. Bu proseslər gedəcək. Hafiz müəllim də öz müsahibəsində bunu bildirib. Novruz müəllimə də tapşırılıb ki, gənclər daim diqqətdə saxlanılsın və tədricən əsas komandaya cəlb olunsun. Novruzun üzərinə nə vəzifə düşürsə, edəcək. Hər bir şeyə o cavabdehlik daşıyacaq.

- Əzimov müsahibəsində bildirmişdi ki, "heç yerə getmirəm, öz vəzifəmdə qalıram". Sonradan nə baş verdi ki, fikrini dəyişdi?

- İstefa ilə bağlı sual veriləndə, həmin vaxt fikirli olub. Hələ oyundan qabaq özüm deyirdim ki, “Mura”nı keçməsək, çıxıb gedəcəm. Bu, mənim üçün də biabırçılıqdı. Məğlubiyyətə söz tapa, bunu qəbul edə bilmirəm. Ona görə də Novruz müəllimin həmin vaxt o sözü deməsi normaldı. Çünki heç nə aydın deyildi. Yəqin həmin vaxt nəsə fikirləşib. Onu özü sizə deyər. Yenə deyirəm, Novruz hələ bir neçə gün öncə buna qərar verib. Sadəcə, istəyirdi ki, Hafiz müəllim bundan məlumatlı olsun. Prezidentin isə qonaqları var idi. Başı qarışıq idi. Ona çatdırıldı ki, Novruz belə eləmək istəyir, sizi gözləyir. Hafiz müəllim dedi ki, özü necə istəyir, elə də etsin. Novruz yenə də “Bakı”da qalır, öz işinə davam edəcək. Sadəcə, başqa istiqamətdə və daha səmərəli.

- Bojidar Bandoviçin beynəlxalq təcrübəsi var. Elə olmazdı ki, bu dəyişiklik Avroliqa öncəsi gerçəkləşərdi?

- Hər şey ola bilərdi. Mətbuat bizi qınayırdı ki, xarici məşqçi gətirirlər, yerlilərə güvənmirlər, şans vermirlər. Bu gün biz qabağa getmək istəyirik. Mən də bunu qabaqcadan bilirdim ki, lazım olan şeyi yerlidən ala bilməyəcəyik. Bu, bizim üçün aydındı. Mən neyləyirəm, gəlib Azərbaycanda nəsə edim? Düzdü, burda da nəsə eləmək lazımdı ki, Avropaya çıxasan. Əsas məqsəd Avropada uğur qazanmaqdı. İndi başa düşürsüz ki, bu, bizim üçün niyə faciə sayılır? Bundan sonra nəsə deməyin yeri yoxdu.

- Hücum xəttində ciddi problemlər mövcuddu. Nə Parks, nə də Verpakovskis komandaya kömək edə biləcək gücdədi. Yəqin ki, çempionatın startına qədər ilk işiniz səviyyəli hücumçu gətirmək olacaq.

- Problem var. Ən ciddi çatışmazlıq hücum xəttindədi. Özünüz də gördüz ki, bu gün Parks hazır deyil. Artıq çəkisi var. Ona vaxt lazımdı. Bugünkü gündə o, “Bakı”ya kömək edə bilməz. Ona görə ki, meydançada qaça bilmir. Onunla bağlı baş məşqçi özü qərar verəcək. Ola bilər, Parksa mədəni sürətdə deyilər ki, özünə klub tap. Bizə hazır hücumçu lazımdı, meydana çıxıb, “Bakı”nın iddiasına cavab versin. Ya da olsun Verpakovskis, Soliç, o birisi. Fərqi yoxdu. Baş məşqçi kimi istəməyəcəksə, onun “Bakı”da yeri yoxdu.

- Futbolçulara cəza veriləcək?

- Hamısı cəzalıdı. Bu gün onlara bir daha bildirdim ki, heç biriniz cəzasız qalmayacaqsız. Oyundan əvvəl deyilmişdi ki, udun, gəlin, “premya”nızı alın. Açığı, bu cür faciənin baş verəcəyinə inanmırdıq. Amma yenə də hamısına deyilmişdi ki, uduzsaz, cərimələnəcəksiz. Belə də oldu. Cəza almalıdılar. Bundan sonra danışmağa ehtiyac yoxdu ki, niyə, nəyə görə belə oldu.

- Bilmək olar ki, onlara nə cəza vermisiz?

- Cəzanın məbləğini Hafiz müəllim açıqlayacaq. Nə verəcəksə, o verəcək.

- Pul cəzasıdı?

- Əlbəttə ki! Bunların əsas dəyən yeri puldu. Futbolçulardan 10 manat gedəndə ürəkləri partlayır.

- “Bakı” futbolçulara, xüsusilə də legionerlərə layiq olduqlarından artıq pul verməsi üzündən mətbuatda tənqid olunur.

- Hansına artıq veririk? Parksa? Kimin qiyməti nədi, onu da veririk. Bu, artıq klubun daxili işidi. Çox veririk, az veririk, bizim məsələmizdi. Futbolçulara nə qədər pul veririksə, hamısı kağızdadı. Hər şey şəffafdı, görünür. Bir adam gəlib desin ki, bu gün rəhbərlik tərəfindən mənə qarşı belə bir hərəkət olub. Heç kimə kələk gəlinməyib. Belə bir şey olubsa da, futbolçular bizə kələk gəliblər. Gəlib, müqavilə bağlayıb, futbol oynamayıblar. Bəzi bəhanələr gətiriblər. Ona görə də fikirləşirəm ki, aldadılan bizik, başqa heç kim. Futbolçular ancaq aldatmağı bacarırlar. Özləri heç vaxt aldanmazlar.