Türkiyənin “Fənərbaxça” və “Beşiktaş” klubları növbəti transferlərini reallaşdırıb. Stadium.az xəbər verir ki, hər iki İstanbul təmsilçisi bir yerli futbolçuyla güclənib.
“Beşiktaş” “Gənclərbirliyi”nin gənc forvardı Mustafa Pektemek ilə sıralarını genişləndirib. “Ağ-qaralar” bu hücumçu üçün paytaxt klubuna 4 milyon avro transfer haqqı ödəməli olub.
Maraqlıdı ki, “Beşiktaş” Ankara təmsilçisinin birdən-birə iki futbolçusunu almaq istəyirmiş. Lakin qarşı tərəfin Mustafa Pektemek və Orhan Şam üçün 9 milyon avro tələb etməsi və güzəştə getmək istəməməsi “ağ-qaralar”ın sadəcə Pektemeklə kifayətlənməsinə gətirib çıxarıb.
Mustafa Pektemeki almaq üçün Türkiyənin digər nəhəngi “Fənərbaxça” də çalışırmış. Hətta klub prezidenti Əziz Yıldırım da bunu etiraf edib. “Sarı-lacıvərdlilər” də Pektemek transferində uğursuzluğa uğramalarına rəğmən, “Beşiktaş”ın ala bilmədiyi “Gənclərbirliyi”nin digər futbolçusu Orhan Şamı heyətinə qatıb.